Monday, 22 February 2010 13:17
Kum 62 hilhial phata ZOMI NAM NI tuang hong tung nawnt a, a kua a kua le hiai ni in chu I phur sauh2 khop mai un ka gingta. Nampuan chi tuamtuam, nalh taktak toh kizeem Lia-le-taang duang nalh taktakte I etlawm thei mahmah uh hi.
A hi a Zomi namni peen lawm I hi uh hia ahihkei leh kizang hi zaw hia chih dotna poimoh tak a hi. Hiai’ Ni hong pian daan I theih veksa uh hi diing in a gintaathuai a, huaiziak in va sut vak I sawm kei. Tua ahihman in Zomi Nam Ni peen ah lop diing bangmah om lou bang kasa hi. A diktak a geen in hiai ni pen dahhuai ni hizaw lou hiam ka chi hi. Huaiziak in Zomi Nam Ni peen kilawm lou a kizang ahi chi nuam daan I hi.
Bangziak a minam(Nation) khat kichi ngaal a Nam Ni (National day) lop diing om lou a, banghiam khat hun paisa a thiltungte theih gigena a zang zaw I hia chi hi dotna poimohtak hong hi nawn leu leu hi. Simlei vai (Politics) a suakta (survive) nai lou, nam lianzawte’ thunuai a henkol bun bang a om tadih I hih ziak in kipahna ni daan a lop zuazua diing nei nailou I hi. Huai ziaktak in ahi phamsa mihangsante sunni, gamngaihla lungleen huai taktakte sakni leh suahtakna I geen nilouh uh.
Mimal, society hi in nam hitaleh tulel (present) activities dungzui in I mabaan ding a kimulawk (90%) thei hi. Huchi ahih leh tulel a I activities te uapan in chu zomni Nam Ni kum 200 zang lele I lawm thei nai kei diing uh a bang. Practical/practicable tak tup-le-ngim nei lou chu maban sawn diing daan tuan le om lou din mun a ding I hi diam chih hon ngaihtuahsak hi. Tulel a I nam dinmun I et leh mihausa leh sum neite’ thuneihna leh vaihawmna nuai a thu pai ahi. Politics lam hi in Saptuam lam hitaleh vision nei kitasam . Simlei vai a lah intellectual circle te thudot leh thulaak hi lou uh. Minam vaai ah kuan vision a nei a mabaan bangchi paileng bangtan ki tung diing hiam, kuate khawng dottuak a om a chih lamlam kuaman buaipih man lou. Bangchituk in lehkha siam lou in mawl leh leng sum hau ahih naak leh thupai himai. Vaihawmna a khut a piak hi pahpah. Sum muhna dik a hausa hia hilou chih suizui le hinawn saam lou. Huaiziakin sum a hong pau chiang in diktatna, ki itna, ki lainatna in mun a nei nawn ta kei hi. Sum a hong pau chiang in bangchituk in diktatna thu tangkoupih leeng le kuaman thulaak lou hi. Sum hau in migenthei khosak haksakdan phawk baan lou hi. Amah a diing in leitung khosakna a diing a apoimoh te neih haksa lou ahihman in mimal’ hamphatbeh na diing leh punna ding om lou pi tha-le-zung, hun tampi va seen a gam leh nam maban va khual khaul pen thasial huaipi hong suak hi. Huchimanbang in migenthei, a dinmun a theihpih ngei louh pi va kankuah a suahtakna diing tangkoupih a, tha le zung seenga a va kipen pei nilouh pen amah ngaihtuahna ah haihuaipi ahi. Hichibang mi, Individualistic, sum hau leh mimal punna diing lou ngaal a kalsuan ngaap lou honkhat vaihawmna nuai a minam khat om I hina ah tutadih in politically survive lou I hi diam I chi hi. Kipahnani leh kipahpih diing khop minam in lop diing I nei nai kei. Kum bangzah hiam I lawm kei lai diing.
A tawp chiang in lower middle class leh a nuailamte’n hong lungkim thei nawn mah mah kei diing ua, a lou thei lou in revolution tak tak hon pan diing uh. Hiaite’ hong vualzoh ni chu political a I survive ni uh puankhiatni leeng hon hi diing hi. Politically survive Nam I hih chiang un National Day kipaak leh nuam in I lawm zuazua thei pan diing uh hi. Huai masiah Zomi Nam Ni zang tou zeel ni.
Bangchik chiang in Zomi Nam Ni I minam in I lawm thei diing ua ?
Connection, November 2011