Articles

"Lai simsim inla, na siam chiang in; Nang hong siam na Toupa mangilh ken" chih la nalhtak mai a All India Radio Imphal te'n a play sek uh a sa-tu leh a tamzaw in Kimneu chi a I theih uh, Chingmuankim Shoute min a kigen khak chiang in lasiam leh nungak melhoih tak lungsim ah hong lang pah mai hi. Lasak asiam ziak in, eimi te lak ah la leh tumging (music) toh kisai ei theihphak a award sang penpen "SIMAS '07- best female Gospel Singer Award" piakin ana omta hi. Hiai kia lou in leng college level ah "Western Music Competition" ah siampen hih ana laktak banah SSPP Lamka block conference 1995 kum in solo competition ah khatna ana la ngei hi.

Eimi te lak kia hilou in, Bangalore level ah leng lasiam a theih phak ahi. Bangalore khopi ah 5 star deluxe hotel minthang mahmah ITC Hotel Winsor Sheraton & Towers (Winsor Manor) leh Taj West End Hotel te ah professional singer contract ana sign a, musician minthang taktak toh ana sem khawm uhi. Laizilna (education) lam ah "post graduate in Human Resource Management" ahih ziak leh a career lam khualna ziakin lasakna contract pen renew nawn lou in TLI company ah hiai thu gelh ahih tan nna asem.

Five star hotel lian khawng ah event lian taktak om zel a, advance Christmas, Easter leh wedding reception khong ah lasa din chial in a om zel. Jazz musician (pianist) ka mel theih Samuel Rajkumar in "A good singer like Kim with good looks is so hard to find in our industry. It’s a blessing to perform with her" chi zen dan hiin...

Huai kia lou in Naga Christian Fellowship, Bangalore te'n 2008 kum tawp khawmpi lian "Festival of Praise- 08" a lasa di'n special in chial ua, college akai lai na ngawn in leng biakinn lian mahmah Methodist church ah, amau college kaina JNC represent in la vasa zel hi. BSI (Bible Society of India) head office, Bangalore ah leng Pajos phatna la sa dia chial-tuam in om sek hi. Huai lou ei theih phak na chiang ah Capstone Ministry (Gospel Ministry), GETS leh adangdang ah Pajos phat na la sa dia deih tuam-a chial in om zel hi. Amah omna saptuam EBCC, Bangalore ah leng ahihtheih tawp suah in pan ala. Khovel mitmuh a munthupi te a sem-in leh mi ngaihsang a lasiam himahleh ami-asa te'n Sunday nitak lam teng a Pajos biak khawmna Zomi Christian Fellowship ah sound system thupi lou chik himahleh Pajos phatna-la chimul bang thou sungsung zou a lungkhoih in, siamtak in awi thei  hi.

RISE TO FAME LEH NIDANGLAI THU TAMLOU

Naupan lai a, nitak lam dak 4:20pm a Paite programme a la hong ki sa sek, huai hunlai la minthang pen pawl a ki gen, "A, Aw, B, Ch... lai simsim inla nasiam chiang in... nang hong siam na Toupa mangngilh ken.." chih la satu a numei naupang kha Kimeu ana hi dan eive. Mipi mai a la asak masak na pen ahih leh Phailian (Lamka) a om Royal Academy ah advance Christmas programme ahi. Hiai apat in numei naupang ‘Kimneu’ talent theih khiak in hong om ta. Heutupa V. Siampu heu in All India Radio te ah la hon khum pan ta uhi. Radiodirector ten le hiai numei naupang (Kimneu) ah kitheihkhem-moh vuallouh talent hoih tak om ahi chih thei in khahsuah mai ding alauh ziak un naupang chik himah leh "radio artist" in amin ana gelh lut uhi. Tuni tan in AIR (All India Radio) Imphal leh Doordarshan kendra, Imphal te ah "artist" dan a recognized ahi, lasak na hun piak in om zel a, lasak man leng piak hizel.

School, sunday- school/ biak-inn, radio leh mun tuamtuam ah lasa zel a, 1999- 2000 kum lakvel in lasa-siam  minthang S. Pauginmuan in Siallouh Vangngaih II music album bawl pih a, huai tak in "Nih-gel itna" chih la Lamka khodung khaw-vai leh a seh-vel ah laar-in hong laar pet mah hi. Huai apat chu Kimneu aki gen khak chiah "Kimneu lasiam kha..." chi ngen in ki gen kheu-khou ta. Huai hunlai vel a ama lasak hit (laar) mahmah te ahih leh - "Nih-gel itna", "Melmuh chiil pan", leh  "Lungdeih ngaih" (LT Paite' toh asak uh) chih te khong ahi. Phamsa salpha Sir Funny in gamngaihla deih thoh tak-a  aphuah "Nampi lungphawng" sa tu ding in special request ana bawl a, aman leng hoih tak in saksak hi. Tunnu Zogam Vol. III ah ngaihkhiat theih ding. Huai lou,  khalam la (Pajos la) a minthan pih mahmah ahih leh "Nuam den ta ding" chih leh "Khamuan Pa" (V. Siampu phuah tuak) ahi. SIMAS 07 lai -a singles "Tunnu Zolei" chih la Zomi rapper ngaihsan mahmah Ma-Muan toh asak uh leng khangthak te lak ah laar mahmah hi.

Tunitan in amah mimal music album "Hong len gige'n" chih kia bawl pan a, hiai le eimi music video kibawl khe-te lak ah kikhong tam pen pawl ahi. Hiai music video album ziak mahmah in "SIMAS '07 best female gospel singer award" ngah hi. A la-te hoih leh nalh sa in choreography leh mi tamtak te’n function leh kikhopna mun te ah sa zel uhi.

PERSONAL

Pa (Dr.) Thangaminlian Shoute leh nu Chiingouman kikal a gil a gah gou tan 5 (nga) te lak a 2 (anih) na ahi. March 5 a birthday ahi a, a star sign Pisces ahi. U leh nau, nu leh pa khual mahmah mi ahi. Lungsim piching tak nei a apawlh nuam kia hilou in, chiamnuih dong thei mahmah mi ahi. Mi phatuamngai thei mi ahi a, alawm te'n a ngaina thei mahmah uhi. Om maimai chiang in lasak leh la ngaih khiat chih louh ann huan lam a lunglut, ameh huan alim thei lua. [Tu nitak le hiai website adi biography gelh dia houlimna  a kineih kawm in dinner vawk sa meh lim deuh hon meh pih a, ki tai mahmah... ]

[Bangalore Zomi Woman Achiever - Music & entertainment: unaunu Chingmuankim in ama biography tamlou gelh dia ka ngetna uh hon phal sak ziak in Bangalore Zomi website palai te kakipak pet mah uhi. BangaloreZomi.com sik-le-tang a hiai thugelh ding toh kisai hon kaikhawm Heutupa Sumchinmang tung ah leng kilungdam petmah. A tung a thu kigelh te clarification poimoh leh theihbeh nop omleh " This e-mail address is being protected from spambots. You need JavaScript enabled to view it " ah e-mail khak in. Phalna omlou in koi mah a hiai thugelh laksawn phal ahi kei.

Admin Team]

Next >