ZCF Bangalore leh EBCC Bangalore in Christmas Munkhat ah lawm khawm
EBCC Bangalore in Wesly Tamil Church-te Auditorium ah Kumthak melmuh Pathian kiang a kipahthu genna progam nuamtak in zangzouta. Program nitaklam dak 1:30 in kipan a, Lasiam tuamtuam te a pan in phatna la ngaihnop huai taktak ngaih khiak na in zui ngal hi. Bangalore a dia amasapen ding in 'Bangalore Male voice' te a pan in phat na lasak ngaih khiak na om hi. "Drum chauh tumthei ka kisak leh, la le sa siam pi dan kana hi" chi in Minlun in a lasak zoh phet in naknoh thethu in gen hi. Hun kidaih louh ding lauh ziak in phatnala sanuam teng in leng hun tang zoulou uh hi.
Tua zoh in Rev Dr Pumza Tombing in thugen ding in stage hon luah a, tua khit bel, sap-te chih dan leh "History" himai ahi. Dr Pumza bel a taksa lian lua hikei mah leh stage tung amah a ding in hutawk lou hi. Usher ten stage tung a mike leh lectern kikoih teng a hep khiat bang uh ngai hial hi. Nidang a eimi-ten Pathian thu I na ngaih nat dan leh I na mawl dan lunglut huai tak ngaih khiatna om hi. "Sapten zawng lah hilou Mihing lah hichiah lou a hon chi ua, zawng lam naih zaw deuh I hi uh" a chih in mipi nui zak sak humhum hi. "Nidang in hiai zaw pil mel deuh hive aw; Namdang te ahi di.
Hiai zaw hai mel deuh hive aw; Eimi ahi ngei ngei di I chi sek ua" chi in Dr Pumza in gen a, "Himahleh tun zaw, Hiai pa kha pil mel deuh hive aw; Eimi ahi ngeingei di. Hiai pa zaw hai deuh hive aw; Namdang ahi ngei ngei di". "Mithupi deuh khawng, namdang di I sak a, I zahtak bawl deuh sim leh, I kiang a hong tun tak a eipau a ahong pau leh; Maimah oh! Nang lah nana hi a? Eimi ana hi lel tak" chi a agen bel dik mahmah hi. Thathoh huai tak mai, amah lah thathou thak a, eimi te 'Mialna a kipan a vakna : From darkness to light : Chiangkang zang a bang khat sek te apan a, tui zangta te' chi a gen khawng dik mah mah hi. Tangthupha in zaw I khang uh kheng law ngut dan ahi.
"Tua tangthupha I muh uh, eimah a kikep mai a, um uih mai ding I duam?" chi in mipite, a diak in tuailai-te chou mahmah hi. Dr Pumza thugen bel manpha mahmah hi. A man ding teh le, akammal-akammal a teh ngai phial ding bang hi. [A chiangzaw na ngaihnop leh a video ana en mai in].
Tua teng ban ah, Nupa-pa a lasak kidemna bang om lai hi. Tek nung vuai nung chi lou a, Pa Thawng te nupa in phatna la sa a ahong lam uh zaw, Mipin a lasak sungteng uh khut beng den mai uh hi. Tua ahih dungzui mah in siampen nihna prize tang uh hi. Pa Thangchinlal te nupa bel siampen hihna kipahman piak tak mah ahi uh. A phatna lasak ua, a zi Lunkim in phur tak a ahon nungthuap zaw, sapte'n "Behind every successful man, there is a woman" a chih uh tangtung sak tute lak a khat ahi ve ua chih ngaihtuah na piangsak mahmah hi. Ahitak in bel, Pa Thangchinlal in leng a leengkul hih a 'Legend' a mansuah a kisik a gin huai kei. Thamlou in, "Hichi didan kisa leh" chi a angih tuah thakthak a gintak huai zaw.
Lenkhop na om lou a Khristmas leh kumthak zatna bukim theilou ahih ziak in, hun kibichilh tak kal ah aam tak leh khelah tak in kileng khawm hi. Himah leh tutung in bel, lenkop zaw khuang toh mah a pupa ngeina dan tak a I leenkop kan a nuam om lou ahi chih hon muchian sak thakthak. A ziak bel, khovel khantouh dungzui a Keyboard leh Guitar chihte toh phatna lasakna a zat himah leh, leenkhop na hial dia zaw! I ngeina dan a dia a subuai tu lam a pangzaw ahi. Pa Thawng in "Christmas lai a ka la deih I sak khaklouh uh, Chiamsa mang Immanuel I sa lai haamhaam di uh" chi a," 'Aw ngailou na hiam, suangmanpha khawpi tualnuam? Tuangnung siah a gankuang a nongzaal' chih mahmah thupi ka sa a ka deih tenten ahi" chih agen zoh in "Chiamsa mang la kisa a", Kikhelah tak in Pa Thawng mah in Hunkhakna leh Annkuang latna a neih zoh in Tuanvaiten limtak a "Zo ann" a huan uh kinek zoh in Kumthak lopna hun, ngaklah tak a kumkhat sung ana ngak nawn ding in mipite pailiam ta uh hi.
As experienced by | Ginvanglian , CNS [Connection News Saitute]
L E M L A A K K H E N K H A T
Courtesy : James P Guite | Christmas Zatna
Courtesy : TKM Tonsing | Christmas Zatna
Courtesy : Jamsuanmung Valte | Kumthak Zatna
Courtesy : TKM Tonsing | Kumthak Zatna
written by zokhankhual, February 04, 2010
| < Prev | Next > |
|---|
Laizom Tongsuah Aug 29