“LAMKA, LAMKA…CHI IN”

Hiai Laa phuaknalh kasa khopmai ahi. Paradise ah nopna omding toh tehkak hial I khopi dang kigenlou ahihman in Lamka zaw ana nuam mah hi.

LAMKA MITE NGAIHSANG

Khenkhat in chiamnuih in a gen sek uh; Nungak Helna dingin hiai-te value kibang chi uhi - Thanlon ah Leather Jacket; Kangkap ah Torch Light; Lamka ah Bike. Kua’n va suisui leng ahi mai.

Hiai hih dik ahina chih Thanlon leh Kangkap pha ngeilou ka’ihchiah, ka theikei. Tuabang bok in theihchian hiloupi Lamka lam thu hon gelh mawkmawk ding kahi.

[Ei mite kitenna daan chi tamtak om - Jawlgai, Kigukthoh, Pupa Dan, PTC Court leh Saptuam Dan Siangthou a kitenna. Hiaite lak ah Society in a pomtheihlouh a omkei, duhthusam bel a hivek kei uh. A hun leh a mun toh kituak a kitenna om (hong om) ahihman in khat mahleng nelhsiah theih hi khollou ding uhi, poimoh ngaihzawk theih a om diam?]

Moulap/ Moukhak Thupi Ngaisang: Gensau sese lou in, a biktak in Saptuam in pan a lakna uh Khotang inleng kithuahpih tuak mahmah kasa. Aziak ahihleh kitenna in Nupa Hinkhua khoihkha mahmah (ding) ahihman in. Thugentu khat in, “Dansiangthou a kiteng hinapi, kitenna neihma a chiamkha-te lungkim theilou uh ahi”, chi hi. Lungkimna poimoh ahihdan langsak mahmah in poimoh diak kasa.

Lawmpa khat in, ‘Dan Siangthou a kiteng, Car khawng a kipi zatzat…kal khat nunga sihzou pok ngen hop chuh ka nuam puai’, chi hi. Awmtak ahi. ‘Neihval a kitenna kinei hilou eive’, a dangkhat in chi nawn hi. Huaiziak hi’nteh, khenkhat a dia baihlam pi a bat, huai leng Dan Siangthou a kiteng hizeih lai. I ngaisang ua, huaite moulopna/ moukhakna thupi na maizen e! chihding tam mahmah hi.

Neih leh Lam Hau-te Ngaisang: June-24-1997 in Kuki-Zomi kal ah (unau melhaih ziak chi le om) buaina thupitak hongpiang in, khenkhatte adia sihna mai hilou a ki inngamna tun hi. Huai a kipan in Toupa’n hon damsakta mahleh, khosakdan thak I panpan ua, muhtheih dingin KIDEIDANNA toh hong paikhawm ahihman in khenkhat a di’n khosuah haksat dingdan haih vual hilou hi.

Khotang leh Saptuam ah neih leh lam a ki etna a lian hiaihiai a, vaihawmna ah I dinmun kikhe huak jelmai hi. Chitakna leh Kuhkalna toh a seem mipa sangin, amaute sepgah guk leh gal a eukhia a hauhsakpih mite I mai et un, I ngaisang zaw tham uh. Sum in zaw nna sem mah tawk ei.

Khami a kilang-te Ngaisang: Poi mahmah kasak khat im hetkei mawk leng; A nei leh neilou tehna tuh thilpiak ah ahi na chih khak jenjen leh na chikhial ding, khosakna ah leng a hisam kei, himahleh KHAMITNA ah I tehkak kha ua, hihkhial kha thei I hi chidan kei ve. Hiaimah hi’nteh, a jiak dang di theikhang…Saptuam te’n kiteelna a neih chiang ua Lamka lamte huchi/ khachi chih a kithang naknak. Himahleh Lamka ah bel amaute ki ngaisang veve lah aw!

Khopi a Khosa-te Ngaisang: India leh Gamdang Khopi a omkhe-te pawl mah gen nawnta leng. Khenkhat-te Lehkha siam leh Sepna sangtaktak nei bang, mi tei himhim a theih a om leh nasep kizen pipi ahihman un sum tampipi va loh tham uhi. Huchibang mite apan banghiam khat hong om di’n lametna GOLPI nei pawng mawk uh ahihman in ngaihsang louh theihlouh himai. Khopi a khosak haksat dan, sum neihtam a poimoh dan gengen kawm a va khosa zou chuh STAR louh theihlouh (Nungak & Tangvalte khol diak).

Himahleh khenkhat in, eipau bang a le genlou zen in, I nundan hoih leh kilawm innlam a zuih sasa te bang khopi ah effective kei chihbawl in thutak I pialsan uhi. (Ami kisui laizang leng bel om thahahlou ding ahihman, hiai pen zaw ngaihsutna danin paisak ni). Sum leh pai muhna ding ahihnak leh chia nekmoh neilou, sepmoh leng neilou, utlouh lah neilou a ki pumphal zomah lai chi uai. “Kuaman hon mukei na unteh”, chihbawl in, vasa a kikhumna buk apan suakta bangmai pawl leng om kihikha thei hi.

LAMKA NA PAI CHIANGIN…!

Ngaihsang louhding teng ngaisang kha I kisuahsak khak leh ngaihsiam! Bangteng hileh, “A tunga kigelhte zuau man ahi”, chiin kizukkik mawkleng lepchiah hiding kahihman in ka gum veve ding. Theihtuak om bel miteng va omdan hilou in, a tamtawp a 100-a-1 lel ahihkha.

Lamka-te ngaihsang thilte nawlkhin lou, lah, sinsakna diklou pialsan ngam; Biakna Limsak; omdan ah pilvang leh kampau ah huntawk theih a ngai sin. Khovel kilawmna maimai apan, neksiatna gum dinga sum-le-pai hau phut mite apan, sum leh pai a diktatna leisawm mite apan, Khasiangthou theihsakna tellou a Saptuam kipina leh kichiilna apan SUAHTAKNA va puak in.